Drafft Ymgynghorol Methodoleg Asesu Safleoedd Ymgeisiol

6. Asesiad manwl o'r Safleoedd / Cam Asesu ISA

6.0.1 Cynhelir asesiad manylach o'r safle ar gyfer yr holl Safleoedd Ymgeisiol sydd wedi mynd drwy'r cam hidlo safleoedd cychwynnol, bydd hyn yn cynnwys eu hasesu o'u cymharu ag amcanion ISA yr Awdurdod Cynllunio Lleol (Gweler Atodiad 1). Mae'n ofynnol i'r Awdurdod Cynllunio Lleol ddatblygu methodoleg asesu gynhwysfawr a systematig i asesu Safleoedd Ymgeisiol yn llawn er mwyn penderfynu a ydynt yn gynaliadwy, yn hyfyw ac y gellir eu cyflawni. Bydd hyn yn cael ei wneud yn dilyn yr Ymgynghoriad Strategol ac yn ystyried sylwadau ymgyngoreion ac unrhyw sylwadau a geir.

6.0.2 I ddangos bod y CDLl Newydd yn gadarn wrth gael ei archwilio, bydd yn rhaid i'r Awdurdod Cynllunio Lleol gyfiawnhau'r meini prawf a ddefnyddir i asesu cynigion Safleoedd Ymgeisiol ac asesiadau o safleoedd cysylltiedig. Mae'r Llawlyfr Cynlluniau Datblygu (Argraffiad 3) yn ei gwneud yn ofynnol fod y meini prawf a ddefnyddir yn unol ag egwyddorion datblygu a gwneud lleoedd cynaliadwy fel y nodir ym Mholisi Cynllunio Cymru (Rhifyn 11).

6.0.3 Bydd yr ISA hefyd yn darparu dogfennau a chofnod o asesiadau o safleoedd gan gynnwys cyfiawnhad rhesymedig dros statws safle (wedi'i wrthod, dewis arall rhesymol neu a ffefrir). Bydd y Safleoedd Ymgeisiol yn cael eu gwrthod os nad oes ganddynt botensial i fod naill ai'n safle arfaethedig, neu'n ddewis arall rhesymol.

6.1 Asesiad Manwl o'r Safleoedd

6.1.1 Bydd y cam asesiad manwl o safleoedd yn y broses Safleoedd Ymgeisiol yn dechrau ar ôl yr ymgynghoriad ar Strategaeth a Ffefrir y CDLl Newydd ym mis Mai/Mehefin 2023 a bydd yn ystyried unrhyw sylwadau a ddaw i law. Ni fydd unrhyw safleoedd a gyflwynwyd ac a gafodd eu gwrthod fel rhan o'r hidlo safleoedd cychwynnol yn destun asesiad manwl o'r safleoedd ac ni fyddant yn cael eu hystyried i'w cynnwys yn y CDLl Newydd.

6.1.2 Mae'r meini prawf asesu yn adlewyrchu'r wybodaeth y gofynnir amdani ar ffurflen Safleoedd Ymgeisiol, a thrwy hynny yn galluogi cynigwyr safleoedd i nodi a effeithir ar safle gan un neu ragor o gyfyngiadau/dynodiadau. Mae'n ofynnol i gynigwyr safleoedd ddarparu gwybodaeth ategol sy'n egluro sut y gall y safleoedd ymdrin ag unrhyw broblemau sy'n gysylltiedig â'r safle. Gall yr ACLl ofyn am wybodaeth ychwanegol oddi wrth gynigwyr safleoedd pan fo angen.

6.1.3 Bydd yr wybodaeth a ddarperir gan bob cynigydd safleoedd yn cael ei dilysu gan y tîm polisi cynllunio, mewn ymgynghoriad â meysydd gwasanaeth eraill y Cyngor a phan fo angen, â sefydliadau allanol (megis: Priffyrdd Llywodraeth Cymru, CNC, Ymddiriedolaeth Archeolegol Clwyd-Powys (YACP), darparwyr seilwaith ac ati).

6.1.4 Mae meini prawf yr asesiad manwl o safleoedd yn cael eu rhannu i'r categorïau canlynol:

• Lleoliad a hygyrchedd
• Cyd-destun a chymeriad safle
• Hygyrchedd a chapasiti priffyrdd
• Effaith Amgylcheddol a thirwedd
• Perygl lifogydd
• Ardaloedd/Clustogfeydd Diogelu Mwynau
• Capasiti seilwaith
• Cyflawni a hyfywedd
• Newid hinsawdd, gwneud lleoedd a gwella bioamrywiaeth

6.1.5 Bydd system sgorio 'goleuadau traffig' yn cael ei defnyddio i nodi pa safleoedd sy'n fwy dymunol o'u cymharu â meini prawf asesiad manwl o safleoedd a'r safleoedd hynny sy'n llai dymunol, gweler Tabl 1.

Tabl 1. System Sgorio Asesiad Manwl o Safleoedd.

6.2 Meini Prawf Asesiad Manwl o Safleoedd

Lleoliad a Hygyrchedd

6.2.1 Yn dilyn yr ymgynghoriad ar Strategaeth a Ffefrir y CDLl Newydd a gan ystyried unrhyw sylwadau a gyflwynwyd, bydd y CDLl Newydd yn cynnwys Strategaeth Dwf a Gofodol a Hierarchaeth Aneddiadau.

6.2.2 Yn gyffredinol, mae aneddiadau trefn uwch yn yr Hierarchaeth Aneddiadau yn darparu'r lleoliadau mwyaf cynaliadwy ar gyfer twf, oherwydd eu bod yn cynnig gwell mynediad at wasanaethau a chyfleusterau. Mae aneddiadau yn yr haenau isaf ac yn y cefn gwlad agored yn debygol o fod â llai o fynediad at wasanaethau a chyfleusterau, bydd y Strategaeth Ofodol a'r Hierarchaeth Aneddiadau yn rhoi arweiniad ynghylch lle y dylid dosbarthu twf datblygu gan flaenoriaethu twf yn y lleoliadau mwyaf cynaliadwy (aneddiadau sy'n uwch i fyny'r hierarchaeth aneddiadau) yn y lle cyntaf.

6.2.3 Mae Polisi Cynllunio Cymru (Rhifyn 11) yn datgan, mewn ardaloedd gwledig, "dylai awdurdodau lleol ddynodi canolfannau gwasanaethau lleol, neu glystyrau o aneddiadau llai lle gellir dangos cysylltiad swyddogaethol cynaliadwy a'u nodi fel y lleoliadau a ffefrir ar gyfer y rhan fwyaf o ddatblygiadau newydd gan gynnwys darpariaeth tai a chyflogaeth". Bydd y Strategaeth a Ffefrir yn ystyried y gofyniad hwn. Yn y cyfamser, rhoddir pwysigrwydd i aneddiadau ymylol llai ar lwybrau trafnidiaeth gyhoeddus lle mae cyswllt swyddogaethol clir ag anheddiad mwy sy'n gweithredu fel canolfan wasanaeth.

Tabl 2. Maen Prawf 1: Strategaeth a Ffefrir a Hierarchaeth Aneddiadau - Tai

* Diffinnir safle mawr o fewn y CDLl Newydd fel pum annedd neu fwy.

Tabl 3. Maen Prawf 2: Strategaeth a Ffefrir a Hierarchaeth Aneddiadau – Cyflogaeth / Manwerthu

 

Tabl 4. Maen Prawf 3: Perthynas â Gwasanaethau Cymunedol / Cyfleusterau sydd â'r Capasiti i Gefnogi Twf.

^* Mae 800 metr yn cyfateb i ddeng munud o gerdded.

⁺ Mae gwasanaethau a chyfleusterau cymunedol yn cynnwys ond heb eu cyfyngu i: ysgolion, meddygfeydd, deintyddion, archfarchnadoedd, siopau lleol, banciau / cymdeithasau adeiladu, fferyllfeydd, gorsafoedd petrol, neuaddau pentref, canolfannau cymunedol, eglwysi, tafarndai, canolfannau hamdden ac ati...

Cymeriad a Chyd-destun y Safleoedd

6.2.4 Mae'r adran hon yn ystyried cymeriad a chyd-destun y safle sy'n cynnwys ystyried a yw'r Safle Ymgeisiol ar dir sydd wedi'i ddatblygu eisoes neu ar dir glas (fel y'i diffinnir ym Mholisi Cynllunio Cymru (Rhifyn 11). Mae Polisi Cynllunio Cymru yn ei gwneud yn ofynnol i ACLlau ddilyn y Prawf Cymalog ac ystyried safleoedd tir a/neu safleoedd sydd wedi'u tanddefnyddio o'r blaen ac wedi'u lleoli o fewn aneddiadau presennol yn y lle cyntaf, gyda safleoedd ar gyrion aneddiadau yn cael eu hystyried wedi hynny. Os nad oes tir sydd wedi'i ddatblygu o'r blaen ar gael, yna dim ond bryd hynny dylid ystyried safleoedd tir glas addas a chynaliadwy o fewn neu ar ymyl aneddiadau.

6.2.5 Mae cymeriad a chyd-destun hefyd yn ystyried ffactorau megis a all nodweddion topograffig neu ddatblygiad ffisegol ar y safle rwystro datblygiad, pa un a allai defnyddiau tir cyfagos gael effaith andwyol bosibl ar y saflegyda'r posibilrwydd o halogi tir neu beidio.

Tabl 5. Maen Prawf 4: Tir a ddatblygwyd o'r blaen / Tir Glas*.

* Noder: Bydd y Prawf Cymalog o ran blaenoriaethu'r defnydd o dir a ddatblygwyd o'r blaen yn hytrach na defnyddio safleoedd tir glas yn cael ei ddilyn.

Tabl 6. Maen Prawf 5: Nodweddion Topograffig* neu Ddatblygu Ffisegol⁺ ar y Safle a Allai Rwystro Datblygiad.

* Mae nodweddion topograffig yn cynnwys graddiannau serth a thir ansefydlog (bydd yn ofynnol i gyflwyniadau mewn ardaloedd o etifeddiaeth mwyngloddio glo ystyried gwybodaeth mwyngloddio glo, efallai bydd angen mesurau lliniaru (darperir rhagor o wybodaeth mewn nodyn cyfarwyddyd).

⁺ Mae datblygiad ffisegol yn cynnwys adeileddau presennol, nwy o'r prif gyflenwad neu linellau pŵer neu linellau pŵer uwchben.

Tabl 7. Maen Prawf 6: Effaith Andwyol ar Amwynder (Sŵn, Arogl, Llygredd Golau neu Lwch) sy'n Deillio o Ddefnyddiau Tir Cyfagos a Allai Fod yn Wrthdrawiadol*

* Mae'r egwyddor cyfrwng y newid (a nodir ym Mholisi Cynllunio Cymru Pennod 6) yn dweud mai'r busnes neu'r person sy'n gyfrifol am gyflwyno newid sy'n gyfrifol am reoli'r newid hwnnw. Mae hynny'n golygu y byddai'n rhaid i gynigydd safle sicrhau y ceir hyd i atebion i fynd i'r afael ag ansawdd aer neu sŵn o seilwaith, busnesau neu neuaddau cyfagos a'u rhoi ar waith i sicrhau bod datblygiad yn dderbyniol.

Tabl 8. Maen Prawf 7: Tir Halogedig

Hygyrchedd a Chapasiti Priffyrdd

6.2.6 Mae polisi cenedlaethol yn tynnu sylw at bwysigrwydd gwneud lleoedd cynaliadwy gan sicrhau bod datblygiadau newydd â mynediad at ystod o wasanaethau / cyfleusterau drwy amrywiaeth o ffyrdd yn enwedig drwy gerdded a beicio ("Teithio Llesol"). O ganlyniad, mae'r pellter cymharol i'r cyfleusterau presennol, trafnidiaeth gyhoeddus, gan gynnwys lefel ac amlder trafnidiaeth gyhoeddus yn ffactorau pwysig wrth benderfynu addasrwydd y safle.

6.2.7 Fodd bynnag, mae polisi cenedlaethol hefyd yn cydnabod bod y cyfleoedd ar gyfer lleihau'r defnydd o geir a chynyddu'r defnydd o gerdded, beicio a thrafnidiaeth gyhoeddus yn fwy cyfyngedig nag mewn ardaloedd trefol. Mae paragraff 3.39 o Bolisi Cynllunio Cymru (Rhifyn 11) yn dweud "mewn ardaloedd gwledig dylid lleoli'r mwyafrif o ddatblygiadau newydd yn yr aneddiadau y gellir eu cyrraedd yn gymharol dda drwy ddulliau di-gar o'u cymharu â'r ardal wledig yn gyffredinol. Dylai datblygiad yn yr ardaloedd hyn barhau i fabwysiadu canlyniadau cenedlaethol creu lleoedd cynaliadwy a chynnig cysylltiadau teithio llesol da i ganol aneddiadau i leihau'r angen i deithio mewn car ar gyfer teithiau lleol".

6.2.8 Fel y sonnir amdano ym mharagraff 6.2.3, mae Polisi Cynllunio Cymru (Rhifyn 11) hefyd yn nodi (paragraff 3.40), mewn ardaloedd gwledig "Dylai awdurdodau lleol ddynodi canolfannau gwasanaethau lleol, neu glystyrau o aneddiadau llai lle gellir dangos cysylltiad swyddogaethol cynaliadwy a'u nodi fel y lleoliadau a ffefrir ar gyfer y rhan fwyaf o ddatblygiadau newydd gan gynnwys darpariaeth tai a chyflogaeth". Felly, bydd y Maen Prawf yn yr asesiad safle hwn yn asesu safleoedd mewn aneddiadau llai i ddechrau ar sail bod ganddynt gysylltiadau trafnidiaeth gyhoeddus ag aneddiadau mwy sy'n gweithredu fel canolfannau gwasanaeth. Efallai y bydd hyn ac unrhyw faen prawf cysylltiedig yn destun newid wrth i'r Strategaeth a Ffefrir gael ei datblygu.

Tabl 9. Maen Prawf 8: Cysylltiadau Teithio Llesol i Ganol Aneddiadau

Tabl 10. Maen Prawf 9: Mynediad i'r Ardal Ehangach ar Droed

 

Tabl 11. Maen Prawf 10: Lleoliad o fewn Pellter Cerdded (h.y. 800 metr) o Safle Bws neu Orsaf Reilffordd Bresennol.

Tabl 12. Maen Prawf 11: Addasrwydd Mynediad i Gerbydau i mewn ac allan o'r Safle a'r Effaith ar y Briffordd.

 

Tabl 13. Maen Prawf 12: Capasiti'r Rhwydwaith Priffyrdd

Tirwedd ac Effaith Amgylcheddol

6.2.9 Ystyrir yr effaith y gallai datblygu'r Safle Ymgeisiol ei gael ar y canlynol

 Dynodiadau treftadaeth naturiol megis

• Ardaloedd Cadwraeth Arbennig (ACA).
• Ardaloedd Gwarchod Arbennig (AGA).
• Safleoedd o Ddiddordeb Gwyddonol Arbennig (SoDdGA).
• Safleoedd Ramsar.
• Gwarchodfeydd Natur Cenedlaethol (GNG).
• Gwarchodfeydd Natur Lleol.
• Coetiroedd Hynafol.
• ac unrhyw ddynodiadau/safleoedd anstatudol rhanbarthol neu leol.
• Rhywogaethau sydd wedi'u gwarchod.

 Dynodiadau'r Amgylchedd Hanesyddol megis

• Tirweddau Hanesyddol Cofrestredig
• Henebion Cofrestredig
• Adeiladau Rhestredig
• Ardaloedd Cadwraeth
• Parciau a Gerddi Hanesyddol Cofrestredig
• ac unrhyw ddynodiadau/safleoedd anstatudol lleol (Cofnod yr Amgylchedd Hanesyddol).

 Tirlun

• Parciau Cenedlaethol cyfagos
• Ardaloedd o Harddwch Naturiol Eithriadol (AHNE) cyfagos
• Nodweddion a phriodweddau gwerthfawr tirwedd Powys.

 Tir Amaethyddol

• Tir a ddynodwyd y Gorau a Mwyaf Amlbwrpas categorïau 3a ac uwch.

Tabl 14. Maen Prawf 13: Effaith ar Safleoedd Dynodedig Treftadaeth Naturiol.

Tabl 15. Maen Prawf 14: Effaith ar Rywogaethau Gwarchodedig.

 

Tabl 16. Maen Prawf 15: Effaith ar Safleoedd Dynodedig yr Amgylchedd Hanesyddol (a'u Lleoliadau lle bo hynny'n Briodol)

Tabl 17. Maen Prawf 16: Effaith ar Dirwedd.

* Rhaid i'r Awdurdod Cynllunio Lleol roi sylw i ddibenion a dyletswydd Parciau Cenedlaethol.

⁺ Mae'r Asesiad Cymeriad Tirwedd Lleol ar gyfer ardal CDLl Powys wedi rhoi sylw i haenau ac ardaloedd agwedd LANDMAP, byddwn yn cyfeirio ymhellach at LANDMAP wrth ystyried Safleoedd Ymgeisiol.

Tabl 18. Maen Prawf 17: Effaith ar Dir Amaethyddol Gorau a Mwyaf Amlbwrpas (BMV)

 

Perygl llifogydd

6.2.10 Cyngor presennol Llywodraeth Cymru ar gyfer perygl lifogydd yw Nodyn Cyngor Technegol (TAN) 15: Datblygu a Pherygl Llifogydd (2004), cefnogir y canllawiau hyn gan Fapiau Cynghori Datblygu sy'n dangos ardaloedd lle mae perygl lifogydd wedi'u categoreiddio yn C1 ac C2.

Diffinnir y rhain fel a ganlyn:

• C1: "ardaloedd o'r gorlifdir sydd wedi eu datblygu ac sy'n cael eu gwasanaethu gan isadeiledd sylweddol, gan gynnwys amddiffynfeydd rhag llifogydd".
• C2: "Ardaloedd o'r gorlifdir sydd heb isadeiledd sylweddol i amddiffyn rhag llifogydd."

6.2.11 Mae TAN 15 yn y broses o gael ei ddiwygio gyda'r fersiwn ddiweddaraf i'w chyhoeddi ym Mis Mehefin 2023. Cefnogir y TAN 15 diwygiedig gan set wahanol o fapiau perygl llifogydd a elwir ar y cyd yn Fap Llifogydd ar gyfer Cynllunio (FMfP). Mae'r rhain yn cynnwys y canlynol:

Parthau Wedi'u Hamddiffyn - Ardaloedd lle mae isadeiledd rheoli perygl llifogydd yn darparu isafswm safon diogelwch yn erbyn llifogydd o afonydd 1:100 ac yn erbyn llifogydd o'r môr o 1:200 (ynghyd â newid hinsawdd a bwrdd rhydd).

Parth Llifogydd 2 Afonydd – Posibilrwydd o lifogydd yn llai na 1 o bob 100 (1%) ond yn fwy na 1 o bob 1000 (0.1%) mewn blwyddyn benodol, gan gynnwys newid hinsawdd.

Parth Llifogydd 3 Afonydd - Posibilrwydd o lifogydd dros 1 o bob 100 (1%) mewn blwyddyn benodol, gan gynnwys newid hinsawdd.

Parth Llifogydd 2 Môr – Posibilrwydd o lifogydd yn llai na 1 o bob 200 (0.5%) ond yn fwy na 1 o bob 1000 (0.1%) mewn blwyddyn benodol, gan gynnwys newid hinsawdd

Parth Llifogydd 3 Môr - Posibilrwydd o lifogydd dros 1 o bob 200 (0.5%) mewn blwyddyn benodol, gan gynnwys newid hinsawdd.

Parth Llifogydd 2 Dŵr Wyneb a Chyrsiau Dŵr Bach – Posibilrwydd o lifogydd yn llai na 1 o bob 100 (1%) ond yn fwy na 1 o bob 1000 (0.1%) mewn blwyddyn benodol, gan gynnwys newid hinsawdd.

Parth Llifogydd 3 Dŵr Wyneb a Chyrsiau Dŵr Bach – Posibilrwydd o lifogydd dros 1 o bob 100 (1%) mewn blwyddyn benodol, gan gynnwys newid hinsawdd.

6.2.12 Mae Llywodraeth Cymru mewn llythyr at ACLlau, dyddiedig 15 Rhagfyr 2021, ynghylch Nodyn Cyngor Technegol (TAN) 15 yn datgan "Pan fo cynlluniau yn cael eu hadolygu, rhaid i'r ystyriaethau risg llifogydd sy'n bwydo i'r strategaeth anheddu a dyraniadau safle fod yn unol â'r TAN 15 newydd a'r Map Llifogydd ar gyfer Cynllunio". Felly, bydd y mapiau perygl llifogydd sy'n ffurfio'r Map Llifogydd ar gyfer Cynllunio (FMfP) yn cael eu defnyddio i asesu addasrwydd Safleoedd Ymgeisiol o ran perygl llifogydd. Rhoddir ystyriaeth i'r polisïau yn y TAN 15 diwygiedig sydd i ddod (a gyhoeddir Mehefin 2023) ac Asesiad Canlyniadau Llifogydd Strategol Rhanbarthol Canolbarth Cymru (2022) (i'w gyhoeddi erbyn Tachwedd 2022).

6.2.13 Bydd safleoedd sydd wedi'u lleoli o fewn Parthau 2 neu 3 y Map Llifogydd ar gyfer Cynllunio (FMfP) (gan gynnwys mewn Ardaloedd wedi'u Hamddiffyn), na fyddant yn bodloni'r profion cyfiawnhad a derbyn meini prawf canlyniadau (o ran defnyddiau a thir eisoes wedi'i ddatblygu a fyddai o dan fygythiad) yn cael ei hidlo allan yn gynnar (cam hidlo safle cychwynnol) yn y broses asesu safleoedd ymgeisiol, mae hyn yn cynnwys cynigion ar gyfer datblygiadau hynod agored i niwed fel tai ym Mharthau 3 Llifogydd Afonydd a Môr yr FMfP a safleoedd nad ydynt ar dir a ddatblygwyd o'r blaen ym Mharthau 2 Llifogydd Afonydd a Môr yr FMfP.

Tabl 19. Maen Prawf 18: Datblygiad Hynod Agored i Niwed* mewn Map Llifogydd ar gyfer Cynllunio (FMfP) parthau Afonydd a Môr 2 a 3

*Yn cynnwys: pob safle preswyl (gan gynnwys safleoedd Sipsiwn a Theithwyr) datblygiadau twristiaeth, ysgolion, sefydliadau gofal plant, cyfleusterau meddygol, safleoedd gwaredu gwastraff, planhigion cemegol, llosgyddion, gwasanaethau brys. Gweler TAN 15 (Rhagfyr 2021) am restr lawn.

Tabl 20. Maen Prawf 19: Datblygiad Llai Agored i Niwed* ym mharthau Afonydd a Môr 2 a 3 Map Llifogydd ar gyfer Cynllunio (FMfP).

* Yn cynnwys: datblygiad diwydiannol cyffredinol, cyflogaeth, datblygu masnachol a manwerthu, seilwaith trafnidiaeth a chyfleustodau, adeiladau cyhoeddus, addoldai. Gweler TAN 15 (Rhagfyr 2021) am restr lawn.

Tabl 21. Maen Prawf 20: Datblygiad mewn Map Llifogydd ar gyfer Cynllunio (FMfP) Llifogydd Dŵr Arwyneb.

 

Ardaloedd Diogelu/Clustogfeydd Mwynau

6.2.14 Nid yw diogelu adnoddau mwynau a chynnwys tir o fewn Ardal Diogelu Mwynau yn rhoi rhagdybiaeth i ddatblygiad gwaith mwynau gael ei ganiatáu ond mae'n galluogi ardaloedd i gael eu diogelu fel nad yw adnoddau mwynau'n cael eu sterileiddio gan ddatblygiad a'u bod yn parhau i fod yn hygyrch i genedlaethau'r dyfodol. Dylid ystyried ardaloedd Diogelu Mwynau fel math o gyfyngiadau i sicrhau bod presenoldeb adnoddau mwynau yn cael ei ystyried yn ddigonol ac yn effeithiol mewn cynigion datblygu.

6.2.15 Mae angen clustogfeydd mwynau o gwmpas safleoedd echdynnu mwynau a ganiateir ac a ddyrannwyd. O fewn y glustogfa, ni ddylid dyrannu unrhyw ddatblygiad sensitif newydd nac echdynnu mwynau. Mae datblygiad sensitif yn unrhyw adeilad sy'n cael ei feddiannu gan bobl yn rheolaidd ac mae'n cynnwys cynigion datblygu megis preswyl, twristiaeth, a chyfleusterau cymunedol lle dylid disgwyl safon amwynder derbyniol. Dim ond mewn clustogfa y gellir ystyried dyraniadau lle na fyddai'r defnydd arfaethedig yn niweidiol i weithrediad y safle echdynnu mwynau.

Tabl 22. Maen Prawf 21: Ardaloedd/Clustogfeydd Diogelu Mwynau.

 

Seilwaith / Capasiti Cyfleustodau

6.2.16 Ystyrir a oes digon o gapasiti yn y seilwaith lleol i wasanaethu'r datblygiad arfaethedig. Lle bwriedir gwneud gwelliannau er mwyn cynyddu capasiti, bydd angen darparu manylion ar sut y caiff gwelliannau eu hariannu, pryd y bydd y gwelliannau yn digwydd, sut bydd hyn yn effeithio ar gyflawni'r safle a sut y gellir cyflawni'r datblygiad o fewn cyfnod y CDLl Newydd (2022-2037).

Mae seilwaith i'w ystyried o fewn y maen prawf hwn yn cynnwys:

• Dŵr
• Gwaith Trin Carthion
• Trydan
• Nwy
• Darpariaeth band eang

6.2.17 Bydd Safleoedd Ymgeisiol sydd mewn Dalgylchoedd Ardaloedd Cadwraeth Arbennig Afonol Sensitif i Ffosffad yn cael eu hasesu yn gynnar yn y cam hidlo safleoedd cychwynnol (paragraffau 4.2.12 – 4.2.14) i fesur y gallu i gysylltu â gwaith trin carthion sydd â phroses tynnu ffosffad (gyda thrwydded gyfoes) mewn modd amserol i alluogi cyflawni o fewn y Cyfnod CDLl Newydd.

6.2.18 Bydd yr Awdurdod Cynllunio Lleol yn casglu rhywfaint o wybodaeth, ar lefel aneddiadau, ar gapasiti seilwaith a gwelliannau sydd wedi'u cynllunio, bydd y rhain yn cael eu cyhoeddi mewn Cynllun Seilwaith ochr yn ochr â Strategaeth a Ffefrir y CDLl Newydd. Pan fydd diffygion yn cael eu nodi o fewn y Cynllun Seilwaith, gofynnir i gynigwyr safleoedd ddarparu rhagor o dystiolaeth i ddangos y gellir cyflawni'r Safle.

Tabl 23. Maen prawf 22: Capasiti Seilwaith.

 

Cyflawni a Hyfywedd

6.2.19 Wrth benderfynu pa mor addas yw Safleoedd Ymgeisiol, un o amcanion allweddol yr Awdurdod Cynllunio Lleol fydd sefydlu a oes gan gynigydd safle fwriad o ddifri i ddatblygu'r safle ac a all wneud hynny o fewn amserlen y CDLl Newydd. Mae hyn yn cysylltu'n uniongyrchol â'r prawf cadernid 'A fydd y cynllun yn cyflawni?' Bydd disgwyl i'r Awdurdod Cynllunio Lleol ddangos hyn yn yr Archwiliad Cyhoeddus.

6.2.20 Efallai na fydd safle sy'n gyflawnadwy yn hyfyw yn ariannol, ac i'r gwrthwyneb. Yn ystod y cam asesu'r Safleoedd Ymgeisiol mae'n rhaid ystyried y ddwy elfen eu cyfanrwydd, mewn modd eang a chymesur, ynghyd ag egwyddorion datblygu cynaliadwy.

6.2.21 Dylai Safleoedd Ymgeisiol fod yn gynaliadwy, yn gyflawnadwy ac yn hyfyw yn ariannol er mwyn cael eu hystyried ar gyfer eu cynnwys yn y cynllun gan yr Awdurdod Cynllunio Lleol. Dylai pob safle fodloni'r paramedrau a'r wybodaeth eang a gaiff eu cyhoeddi gan yr Awdurdod Cynllunio Lleol a bod â digon o hyblygrwydd ariannol i fodloni holl ofynion polisi'r CDLlau Newydd (e.e. tai fforddiadwy, mannau agored ac ati).

6.2.22 Ystyrir yn gynnar yn y broses asesu yn ystod y cam hidlo safleoedd cychwynnol, unrhyw rwystrau rhag cyflawni'r safleoedd drwy naill ai bresenoldeb cyfyngiadau ffisegol mawr ar y safle, hanes cynllunio (e.e. gwrthodiadau), cyfyngiadau cyfreithiol neu gyfamodau sy'n cyfyngu'r safle rhag cael ei gyflwyno yng nghyfnod y Cynllun. Gweler paragraff 4.2.15.

Tabl 24. Maen Prawf 23: Perchnogaeth ac Ystyriaethau Cyfreithiol – Tir Cyhoeddus.

Tabl 25. Maen Prawf 24: Perchnogaeth ac Ystyriaethau Cyfreithiol – Tirfeddiannaeth.

Tabl 26. Maen Prawf 25: Perchnogaeth ac Ystyriaethau Cyfreithiol – Buddiannau Datblygwyr.

Tabl 27. Maen Prawf 26: Cyflawnadwyedd - Safleoedd a Ddyrannwyd Presennol yn y CDLl Mabwysiedig (2011-2026)

* Bydd safleoedd sydd wedi cael caniatâd ac sy'n cyd-fynd â Strategaeth Ofodol y CDLl Newydd yn cael eu dangos fel safleoedd yr ymrwymir iddynt yn y CDLl Newydd.

Tabl 28. Maen prawf 27: Argaeledd Safleoedd.

Tabl 29. Maen Prawf 28: Hyfywedd.

6.2.23 Bydd yr wybodaeth Asesu Hyfywedd cychwynnol a ddarparwyd yn ystod y cam hidlo safleoedd cychwynnol yn destun gwiriad gan yr Awdurdod Cynllunio Lleol. Bydd angen Asesiad Hyfywedd mwy manwl yn y cam asesu safleoedd manwl hwn, lle gofynnir am wybodaeth ac asesiadau ychwanegol i ddangos y gall y safle fodloni gofynion polisi'r CDLl Newydd a pharhau i fod yn hyfyw a chyflawnadwy. Darperir rhagor o wybodaeth ynghylch gofynion Asesu Hyfywedd yn y Nodyn Cyfarwyddyd.

6.2.24 Pan fo datblygiad i'w ariannu trwy fecanweithiau eraill megis grant tai cymdeithasol neu Fargen Canolbarth Cymru bydd angen darparu tystiolaeth amgen i ddangos cyflawnadwyedd.

Tabl 30. Maen Prawf 29: Arfarnu Safle*.

*Bydd y maen prawf arfarnu safle yn ystyried canlyniad meini prawf cam asesu safleoedd manwl blaenorol, ynghyd ag arsylwadau Swyddog Polisi Cynllunio ac ymweliad â'r safle.

Newid Hinsawdd, Gwneud Lleoedd a Gwella Bioamrywiaeth

6.2.25 Mae Polisi Cynllunio Cymru (Rhifyn 11) paragraff 5.8.1 yn nodi, "Dylai'r system gynllunio gefnogi datblygiad newydd sy'n defnyddio ynni'n effeithiol iawn, yn cefnogi datgarboneiddio, yn mynd i'r afael ag achosion newid yn yr hinsawdd ac yn addasu i effeithiau yr argyfwng hinsawdd nawr ac i'r dyfodol trwy ymgorffori mesurau lliniaru ac addasu effeithiol"

6.2.26 Mae Creu Lleoedd yn ffordd holistig o fynd ati i gynllunio a dylunio datblygiadau a lleoedd sy'n canolbwyntio ar ganlyniadau positif. Mae'n tynnu ar botensial ardal i greu datblygiadau a mannau cyhoeddus o ansawdd uchel sy'n hyrwyddo ffyniant, iechyd, hapusrwydd a llesiant pobl yn eu hystyr ehangaf. Mae "creu lleoedd" yn ystyried y cyd-destun, y swyddogaeth a'r berthynas rhwng safle'r datblygiad a'i gyffiniau.

6.2.27 Er mwyn ymgorffori creu lleoedd mae Polisi Cynllunio Cymru (Rhifyn 11) yn ei gwneud yn ofynnol bod cynlluniau datblygu a chynigion datblygu yn ceisio sicrhau datblygiadau sy'n mynd i'r afael â Chanlyniadau Cenedlaethol Creu Lleoedd Cynaliadwy, sef:

• Creu a Chynnal Cymunedau
• Gwneud y Defnydd Gorau o Adnoddau
• Helpu Ein Heconomi i Dyfu mewn Ffordd Gynaliadwy
• Amddiffyn yr Amgylchedd a Chyfyngu ar yr Effeithiau ar yr Amgylchedd
• Hwyluso Amgylcheddau Hygyrch ac Iach

6.2.28 Yn unol â Rhan 1 Adran 6 Deddf yr Amgylchedd (Cymru) 2016, mae'n rhaid i ACLlau gynnal a gwella bioamrywiaeth wrth arfer eu swyddogaethau, gan gynnwys trwy'r broses gynllunio, ac wrth wneud hynny hyrwyddo cydnerthedd ecosystemau. Felly, mae angen i gynigwyr safleoedd ystyried sut y gall cynigion Safleoedd Ymgeisiol ddarparu gwelliannau bioamrywiaeth sy'n cefnogi cydnerthedd ecosystemau.

Tabl 31. Maen Prawf 30: Mynd i'r afael ag Achosion yr Argyfwng Hinsawdd*

* Rhagor o wybodaeth i'w darparu yn y Nodyn Cyfarwyddyd ynghylch yr hyn y disgwylir i gynigwyr safle ei gyflwyno i ddangos cydweddiad â'r maen prawf hwn.

Tabl 32. Maen prawf 31: Creu Lleoedd Cynaliadwy*

* Rhagor o wybodaeth i'w darparu yn y Nodyn Cyfarwyddyd ynghylch yr hyn y disgwylir i gynigwyr safle ei gyflwyno i ddangos cydweddiad â'r maen prawf hwn.

Tabl 33. Maen prawf 32: Gwelliannau Bioamrywiaeth